Takk for no

Sjølv om det framleis er godt med snø i fjellet, erkjenner vi i Jølster Skisenter at våren er komen. Våre kjære kundar har funne fram syklar og hageredskap og pakka vekk skia. Dette betyr at vi avsluttar sesongen her og ønskjer alle gamle og nye kundar attende til ein ny flott sesong i desember.
Takk til alle frivillige som gjennom sin solide innsats gjer at det er mogleg å gjennomføre dette prosjektet på ein god måte, til glede for alle våre gjestar. 
Sesongen 11 - 12 vart ein spesiell sesong med værmessige ytterpunkt i begge retningar. Vi starta rekordtidleg 10 desember på fine snøtilhøve, før Dagmar kom og torpederte romjula. 
Januar og halve februar vart rettleg fin med godt med snø og gode forhold. Frå midten av februar og heilt til påske var det mildvær og regn, medan påska vart kjempefin, med sol og pudderføre. 
Det er framleis pudder i fjella så det er fullt mogleg å oppleve skigleda enno ei tid.